Халдвар илэрсэн жолооч хэвлэлд өгсөн ярилцлагадаа "Энхсаран" сувилалд 21 хоног тусгаарлагдах хугацаанд халдвар хамгааллын дэглэм алдагдсан байж болзошгүй гэж ярьсан. Шадар сайд Я.Содбаатар "Энхсаран" сувилал хариуцлага алдсан нь үнэн. Гэхдээ энэ цагт хариуцлага ярих биш эв нэгдэл чухал байна. Хариуцлага тооцох цаг хугацаа ирнэ. Одоо бидэнд халдварын тархалтыг хяналтдаа авах л чухал байна" гэлээ.
Д жолоочоос халдвар тархах болсон шалтгааныг тусгаарлалтын горим зөрчсөнөөс үүдсэн гэх мэдээлэл гарч буй. Тодруулбал, халдвар авсан жолооч нь “Энхсаран” сувилалд анх хоёулаа нэг өрөөнд тусгаарлагдаж байсан. Гэтэл тэднийг тусгаарласнаас гурав хоногийн дараа дахин нэг жолоочийг нэмж, хамтад нь нэг өрөөнд тусгаарласан бөгөөд эхний хоёр жолоочийг тусгаарлах 21 хоногийн хугацаа дууссан тул ийнхүү гаргаад байсан гэдэг. Гэвч тэдэнтэй хамт тусгаарлагдаж байсан сүүлд ирсэн жолоочийн шинжилгээний хариу эерэг гарсан нь халдвар гадагш тархах шалтгаан болсон гэх мэдээлэл байгаа юм. Халдваргүйжүүлэлтийн наад захын шаардлага хангахгүй, хулганатай, нийтийн шүршүүртэй, олон хүнийг нэг өрөөнд хараа хяналтгүй замбараагүй байлгадаг гэх мэт асуудал тус сувилалаас салдаггүй. Коронавирус цар тахлаас шалтгаалан өнгөрсөн хавар буюу гуравдугаар сараас гадаадаас ирсэн хүмүүсийг тусгаарлалтад авч эхэлсэн байна. Өнгөрсөн хугацаанд тус сувилалд хэдэн хүн тусгаарлагдаж гарсан нь тодорхойгүй байгаа юм. Энэ талаар тус сувиллын захирал О.Түмэнбаяр хэвлэлд өгсөн яриандаа ”Би мэдээлэл өгөх хүн биш. Тусгаарлалтын үйл ажиллагааг бид хариуцаагүй. Нэг өрөөнд хэдэн хүн оруулж, гаргахыг УОК, ХӨСҮТ” мэднэ гэжээ.
