УИХ дахь АН-ын бүлгийн гишүүд мэдээлэл хийлээ. АН-аас Ерөнхийлөгчийн сонгуульд нэр дэвшигчийг бүртгэхгүй бол УИХ дахь АН-ын бүлгийн 13 гишүүн өлсгөлөн зарлана гэдгээ мэдэгдлээ.
АН-ын дарга О.Цогтгэрэл: АН нэр дэвшигчийнхээ материалыг хүлээлгэж өгөхөөр ирэхэд хоёр нэр дэвшигчийн хоёулангийнх нь материалыг хүлээж авахгүй байна. СЕХ хуулиас давсан эрх мэдэл эдэлж байна. СЕХ эрх баригч хүчний заавар даалгавраар парламентад суудалтай намыг сонгуульд оролцох, оролцохгүй байх асуудлыг шийдэж байна.
Нөгөө талаас нэр дэвшиж байгаа С.Эрдэнэ, Н.Алтанхуяг нарыг яаралтай уулзаж асуудлаа шийдэхийг уриалж байна. АН маш их хүлээцтэйгээр асуудалд хандаж ирсэн. Бид тэмцлийн дараа дараагийн асуудал руу шилжихээс өөр аргагүй нөхцөл үүсч байна.
УИХ дахь АН-ын бүлгийн дарга Д.Ганбат: АН-ын бүлэг 12.00 цагт Ерөнхийлөгчийн сонгуульд нэр дэвшигчээ бүртгүүлэхээр ирэхэд бүртгэхгүй гэлээ. СЕХ 9 хүний бүрэлдэхүүнтэй. Гэтэл дарга нь эрх баригч намын ажилтан мэт хандаж байна. 15.00 цагт Ерөнхийлөгч ҮАБЗ-ийг яаралтай хуралдуулах албан бичиг хүргүүлсэн. СЕХ АН-аас хууль ёсны дагуу нэр дэвшигчийг бүртгэхээс татгалзаж байна. Тиймээс бид тэмцлийн дээд хэлбэр болох өлсгөлөн зарлаж байгаагаа мэдэгдэж байна.
