УИХ-ын гишүүн Х.Булгантуяа, Ж.Сүхбаатар нар Ковид19-ын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуульд нэмэлт, өөрчлөлт оруулах тухай хуулийн төслийг өргөн барилаа.
Тус хуулийн төслөөр дараах төрлийн харилцааг зохицуулахаар тусгажээ.
- Барьцаалан зээлдүүлэх газар болон Зээлдэгч хооронд байгуулсан зээлийн гэрээний 2020 оны 11 дүгээр сарын 12-ны өдрөөс 2021 оны 7 дугаар сарын 1-ний өдөр хүртэлх хугацаанд хамаарах хүүгийн хэмжээг 3 хувиар тооцох;
- Барьцаалан зээлдүүлэх газар болон Зээлдэгч хооронд байгуулсан зээлийн гэрээний 2020 оны 11 дүгээр сарын 12-ны өдрөөс 2021 оны 7 дугаар сарын 1-ний өдөр хүртэлх хугацаанд анз, бусад нэмэгдүүлсэн хүү, шимтгэл, хураамж тооцохгүй байх;
- Шударга өрсөлдөөн, хэрэглэгчийн төлөө газраас авч хэрэгжүүлэх арга хэмжээ;
- Барьцаалан зээлдүүлэх газрын хэрэгжүүлэх арга хэмжээ, үүргийг тусгажээ
Ломбард бол жижиг дунд бизнесийн тоонд ордог. Эд зүйлсээ барьцаанд тавьж яаралтай үеийн хэрэглээгээ хангадаг явдал дэлхийн аль ч улсад байдаг зүйл билээ. Хүссэн үедээ өөрийн эд зүйлээ барьцаанд тавьж зээл авах эрхийг иргэдэд үлдээх нь зүйн хэрэг юм. Ардаа хэд хэдэн айл өрхийн амжиргааг залгуулдаг Ломбард эрхлэгчид тус хуулийн төсөлд ихээхэн бухимдалтай байна.
Түүнчлэн Ломбардны хүүг 3 хувиас ихгүй болгож багасгасанаар олон тооны ломбардууд хаалгаа хааж үйл ажиллагаагаа зогсоох эрсдэлтэй юм. Хааж боох тусам сөрөг үр дагвар гарахыг тооцох ёстой. Ломбардууд хаагдсанаар иргэд хоорондын өндөр хүүтэй зээл бий болж залилангийн хэрэг гаарах вий гэх эдийн засагчид ч байна. Нэг хэсэг ЖДҮ-ийн мөнгөөр хууль бус мөнгө угааж буй гэх ББСБ-уудын асуудал өнөөдрийг хүртэл нэг талд шийдэгдээгүй байна. Тийм байтал өнөө маргаашийн амьдралаа залгуулж буй жижиг бизнес эрхлэгчидээ боож хаах нь сүүлийн үед элбэгших болов. Төр иргэдийнхээ нуруунд хүндэдсэн ачааг хөнгөрүүлэх бодлого хэрэгжүүлэх нь зүйн хэрэг юм. Манай улсын иргэдийн дийлэнхи олонхи нь цалин, хэрэглээ, ипотекийн зээлд хамрагдсан байдаг.
