Халдварын голомт байсан нь тодорхой болсон “Энхсаран” сувилалыг татан буулгаж, тэнд тусгаарлагдаж байсан хүмүүсийг ХӨСҮТ-рүү яаралтай шилжүүлсэн ч уг газраас 45 хүн коронавирусийн халдвар авсан гэх мэдээлэл байна.

Тэгвэл тус сувилалд анх хэзээнээс халдварын шинж тэмдэг илэрч, батлагдсан тохиолдол хэзээ бүртгэгдсэн, мөн өмнө тусгаарлалтын хугацаа дуусаад гарсан хүмүүсийг бүгдийг олж, шинжилгээнд хамруулж чадсан эсэх нь тодорхойгүй байсан юм. Энэ талаар ХӨСҮТ-ийн Тандалт судалгааны албаны дарга А.Амбасэлмаа хариу өглөө. Тэрээр “Энхсаран сувилалд 11 сарын 7-ны өдөр анхны тохиолдол бүртгэгдсэн. Анхны тохиолдол бүртгэгдэж, бид багц шинжилгээ хийхэд 24 тохиолдол илэрсэн. Тиймээс 61 хүнийг “Энхсаран” сувилалаас  Халдвартын клиник руу шилжүүлж, тусгаарласан. Тусгаарлалтад байсан учир хугацаа алдаагүй. 11-р сарын 6-аас өмнө 14 хоногийн дотор тухайн сувилалд тусгаарлагдаж байсан хүмүүсийг мөрдөхөд 6 тээврийн жолооч байсан. Тэдгээрээс 3 жолооч нь Улаанбаатар хотод, харин гурав нь Сэлэнгэ, Орхон, Өмнөговь аймагт байсан. Тэдгээр хүнийг байгаа газруудад нь тусгаарласан. Эхний шинжилгээгээр коронавирус илрээгүй” гэв. Эндээс дүгнэхэд тусгаарлалтаас гарч, халдвар тараасан жолооч Д гэж зарлагдсан нэг жолоочоос гадна өөр 5 жолооч байсан болж таарав. Тиймээс дараа нь Сэлэнгэд, ар араас нь бусад аймгуудад онц байдал зарлаж сандарцгаасан бололтой. Тухайн үед ЭМЯ, УОК зөвхөн нэг хүн байгаа мэтээр мэдээлж, бусдынх нь тухай огт мэдээлээгүй нь тэдний тухай  хэзээ мэдэж, ямар арга хэмжээ авсан гэдэгт эргэлзээ төрүүлж байна.