“Оюу Толгой” төслийн гүний уурхайн нэмэлт санхүүжилт бүрдүүлэх асуудлаар хөрөнгө оруулагч талууд зөрчилдөж эхэллээ.

“Turquoise Hill Resources” компани санхүүжилт бүрдүүлэх “Rio Tinto”-ийн төлөвлөгөөг эсэргүүцэж, ТУЗ-ийн тусгай хороо нь “Rio Tinto”-ийн эсрэг арбитрт хандахаар шийдвэрлээд байна. Хувьцааны санхүүжилт байлаа гэхэд хэмжээг нь багасгах, хугацааг нь хойшлуулахын тулд “Оюу Толгой” төсөлд хосолсон санхүүжилт бүрдүүлэх, эсвэл өр, зээлийг нэмэгдүүлэх компанийн стратегитай “Rio Tinto”-ийн санхүүжилтийн хувилбар нийцэхгүй байна гэж “Turquiose Hill Resource”-ийн мэдэгдэлд дурджээ. Арбитрын шийдвэр гарах хүртэл 3-5 сарын хугацаа болно гэж “Turquiose Hill Resource” мөн тооцоолж байна. “Оюу Толгой”-ийн баялгийн 80 гаруй хувийг агуулдаг гүний уурхайн бүтээн байгуулалтын зардал нэмэгдэж, 6.6-7.1 тэрбум ам.доллар болох төлөвтэй байгаа юм. Шаардлагатай нэмэлт санхүүжилтийг бүрдүүлэх асуудлаар “Rio Tinto” болон “Turquoise Hill Resources” компаниуд өнгөрсөн есдүгээр сард харилцан ойлголцлын санамж бичиг байгуулсан юм. Үүнд холбогдох зээлийн эргэн төлөлтийн хугацааг сунгахаар эрмэлзэх, одоо байгаа зээлийн нөхцөлийн хүрээнд олон улсын зээлдэгч нараас 500 сая ам.доллар нэмж татах, бусад санхүүжилтийг “Turquoise Hill Resources” компани хувьцааны санхүүжилтээр бүрдүүлэхээр тусгаж өгсөн байна. Хэрэв эргэн төлөлтийн хугацаагаа сунгаж, нэмэлтээр 500 сая ам.долларын санхүүжилт татаж чадвал “Turquoise Hill Resources” компани хамгийн багадаа 1.7 тэрбум ам.долларын хувьцааны санхүүжилт татах шаардлагатай болох юм. Хэрэв хэлцлүүд амжилтгүй болбол бүрдүүлэх шаардлагатай хувьцааны санхүүжилтийн дүн 3.6 тэрбум ам.доллар гэж тооцоолжээ. Энэ удаагийн арбитрт хандсан алхам нь “Turquoise Hill Resources нэмэлт санхүүжилт татах, хэлцэл хийх дээр “Rio Tinto”-ийн дэмжлэгийг авах сонирхлыг харуулж байна. Гэхдээ бидний үзэж буйгаар “Rio Tinto” үүнийг төдийлөн сонирхохгүй байгаа" гэж “BMO Metals and Mining”-ийн шинжээч дүгнэжээ.