Газрын тосны олборлолт, экспортын үйл ажиллагаа, газрын тосны бүтээгдэхүүн импортлогч, бөөний болон жижиглэнгийн худалдаа эрхлэгч ААН-үүдийн үйл ажиллагаа хэвийн явагдаж байгааг Уул уурхай, хүнд үйлдвэрийн яамнаас мэдээллээ.

Манай улс автобензин 30 хоногийн нөөцтэй байна. Харин дизель түлшний нөөц бага байгаа бөгөөд ОХУ-аас ачилт хийгдэж, замд явж байгаа болохыг мэдэгдлээ. Харин улирлын шилжилттэй холбоотой 10 сард бүтээгдэхүүний нийлүүлэлт буурч завсар үүссэн тул 11 сард түлшний татан авалт нэмэгдсэнтэй холбоотой төмөр зам дээр орж ирж буй вагон болон буцаж гарч буй вагоны бөөгнөрөл үүсч вагоны төлбөр нэмэгдэх,  улмаар түлшний хомсдол үүсэх нөхцөл байдал бий болсон тул төмөр замын тээвэрлэлтийг тусгайлан анхаарч шийдвэрлэх, баруун бүсийн шатахуун хангамжид голлох үүрэг гүйцэтгэдэг Боршоо хилийн боомтыг Цагаан нуур боомтын үйл ажиллагаатай нэгэн адил сар бүрийн 2, 4 дэх 7 хоногт газрын тосны бүтээгдэхүүнийг улсын хилээр нэвтрүүлж байх зохицуулалт хийх, Цагаан нуур боомтоор шатахуун импортолж буй тээврийн хэрэгслийг нэвтрүүлэхдээ жолоочид шинжилгээ хийж, хариу эерэг гарсан тохиолдолд газрын тосны бүтээгдэхүүн бүхий автомашиныг буцаах тохиолдолд Оросын талд их хэмжээний төлбөр, хураамж, торгууль төлөхөөр байгаа учир тээврийн хэрэгслийн тэвшин дэх бүтээгдэхүүнийг буулгуулах, гаалийн баталгаат талбайд автоцистерны толгойг сольж тээвэр гүйцэтгэх, зөөврийн шатахууны сав байрлуулж бүтээгдэхүүнийг хүлээн авах боломж бүрдүүлэх  асуудлыг судалж шийдвэрлүүлэх шаардлагатай байгааг холбогдох албаныхан уламжилсан байна.

Энэ мэтээр хүнс, бензин зэрэг өдөр тутмын хэрэглээний нөөц хангалттай гэж мэдэгдэж байснаа элдэв шалтаг тоочиж эхэлсэн нь хөл хориог далимдуулан үнэ өсгөхөөр бэлдэж буй үйлдэл гэсэн хардлага төрүүлж байна.