Европын Холбоо бүх нийтийг вакцинжуулах зорилготой "COVAX" хөтөлбөрт нэмж 100 сая еврогийн санхүүжилт олгохоор шийдвэрлэсэн байна.

Энэхүү хөтөлбөрийн хүрээнд бага, дунд орлоготой 90 гаруй орны хүн амд зориулж хоёр тэрбум тун вакцин худалдан авч нийлүүлэхээр зорьж байгаа аж. Австри улс хоёр дахь удаагийн хорио цээрийн дэглэмээ чангатгахаар төлөвлөж байна. |Аравдугаар сарын 31-нд хязгаарлалтын арга хэмжээг чангатгаснаас хойш үндэсний хэмжээнд "COVID-19"-ийн халдварын шинэ тохиолдол 73 хувиар өсжээ. ОХУ-д "коронавирус"-ийн халдварын 21.9 мянган тохиолдол шинээр бүртгэгдсэн нь мөн дээд үзүүлэлт болсон байна. Дэлхийн Эрүүл Мэндийн Байгууллагын мэдээллээр клиникийн эцсийн шатны туршилт нь хийгдэж буй "COVID-19"-ийн эсрэг вакцины тоо 10 болоод байгаа аж. Түүнчлэн Энэтхэг улс ирэх сар гэхэд "AstraZeneca"-аас 100 сая тун вакцин авахаар төлөвлөж байна. Дэлхийн хэмжээнд "COVID-19"-ийн халдвар авсан 653 мянга, эндсэн 9.9 мянган тохиолдол шинээр бүртгэгдлээ.