Баян-Өлгий аймгийн харьяат иргэн Улаанбаатар хотод эмчлүүлж байгаад дөрөвдүгээр сарын 4-ний өдрийн шөнийн 00:00 цагийн үед Өлгий хотод иржээ. Тухайн иргэн аймагт орж ирмэгц түргэвчилсэн оношлуураар хоёр удаа шинжилгээ хийхэд эерэг гарсан тул нэн даруй тусгаарласан байна. Улмаар PCR-ын шинжилгээ хийхэд халдвар авсан нь батлагдлаа. Тухайн иргэн Улаанбаатар хотоос хоёр тээврийн хэрэгслээр есөн хүнтэй хамт ирсэн. Хамт ирсэн нэгдүгээр хавьтлын хүмүүсийг аймгийн Авто тээврийн төвд тусгаарлаж шинжилгээ хийж байна. Батлагдсан тохиолдлын биеийн байдал нь хүндэвтэр, чихрийн шижин, бөөрний дутагдалтай архаг суурь өвчтэй хүн гэж аймгийн Эрүүл мэндийн газраас мэдээллээ.

Үүссэн нөхцөл байдалтай холбогдуулан аймгийн Онцгой комисс шуурхай хуралдаж дараах шийдвэрүүдийг гаргалаа. Үүнд:

1. Өчигдөр буюу 2021 оны дөрөвдүгээр сарын 05-ны 19:00 цагаас эхлэн аймгийн болон сумдын төвөөс гарах, орох хөдөлгөөнийг хязгаарлав.

2. Өнөөдөр буюу дөрөвдүгээр сарын 6-ны өдрийн  өглөөний 06:00 цагаас эхлэн 48 цаг аймгийн хэмжээнд тэг зогсолт хийхээр болов.

3. Тухайн хугацаанд хүнсний дэлгүүр, эмийн сангаас бусад төрийн болон хувийн хэвшлийн бүх байгууллагын /төрийн болон нутгийн захиргааны байгууллага, сургууль,  цэцэрлэг, дотуур байр, барааны дэлгүүр г.м/ үйл ажиллагааг зогсоов.

Тэг зогсолтын хугацаанд өнгөрсөн сарын 26-29-ний өдрүүдэд Баян-Өлгий аймгийн Өлгий хотод ирж буяны ажилд оролцон Ховд аймагт буцаж очоод халдвар авсан нь батлагдсан иргэний ойрын болон дам хавьтагчдыг цагдаа, тагнуул, онцгой байдлын байгууллагын дэмжлэгээр өргөн хүрээнд илрүүлж, шинжилгээ хийхээр боллоо.Иймд ард иргэд сонор сэрэмжтэй байж, халдвар хамгааллын дэглэм сахин, аймгийн Онцгой комиссоос гаргасан шийдвэрүүдийг хүндэтгэн биелүүлж хамтран ажиллахыг уриаллаа.

Эх сурвалж: Баян өлгий аймгийн шуурхай штаб